پاکستان تحریک انصاف (پی ٹی آئی) نے آج اسلام آباد کے نواحی علاقے ترنول میں ہونے والا جلسہ ملتوی کردیا۔
پی ٹی آئی کے چیئرمین بیرسٹر گوہر خان نے کہا کہ جلسہ ملتوی کرنے کا نوٹیفکیشن جاری کر دیا گیا ہے اور اب یہ جلسہ پی ٹی آئی کے بانی عمران خان کی ہدایت کے مطابق 8 ستمبر کو ہو گا۔
انہوں نے کہا کہ ہم نے اڈیالہ جیل میں پی ٹی آئی کے بانی سے ملاقات کے بعد جلسہ ملتوی کیا۔
پی ٹی آئی کے سیکرٹری جنرل عمر ایوب نے بھی عمران کی ہدایت پر جلسے کی تاریخ تبدیل کرنے کی تصدیق کی۔
انہوں نے کہا کہ ہمیں اطلاعات ملی ہیں کہ حکومت جلسے کی آڑ میں انتشار پھیلانے کی سازش کر رہی ہے۔
اپوزیشن جماعت کی جانب سے جلسے کی نئی تاریخ کے اعلان کے بعد اسلام آباد انتظامیہ نے بھی اس حوالے سے پی ٹی آئی کو آٹھ ستمبر کو جلسہ کرنے کے لیے این او سی جاری کردیا جس میں 40 ہدایات شامل ہیں۔
اس نوٹیفکیشن کے مطابق اسلام آباد انتظامیہ نے 22 اگست کا این او سی شہر میں مذہبی جماعتوں کی احتجاج کی وجہ سے منسوخ کیا تھا۔ انتظامیہ 8 ستمبر کو جلسے کے لیے سکیورٹی فراہم کرے گی۔
این او سی میں ہدایت کی گئی ہے کہ جلسے کے شرکا لوگ شام چار بجے جمع ہوں گے اور جلسہ شام سات بجے ختم کرنا ہوگا۔
نوٹیفکیشن میں دوبارہ زور دیا گیا کہ یہ اجازت عوامی اجتماع کے لیے دی گئی ہے تاہم یہ جلسے دھرنے میں تبدیل ہونے کی اجازت نہیں دی جائے گی۔
اس سے قبل پی ٹی آئی نے جلسے کے لیے این او سی کی منسوخی کے باوجود اسلام آباد میں ریلی نکالنے کا اعلان کیا تھا، جس کے بعد پولیس نے اہم شاہراہوں بالخصوص شہر کے داخلی اور خارجی راستوں کو سیل کر دیا تھا۔
پولیس نے فیض آباد، ڈبل روڈ اور چونگی نمبر 26 کے بس اسٹاپ کے راستے اسلام آباد جانے والی اہم شاہراہوں کو بھی سیل کر دیا، سڑک بند ہونے سے گاڑیوں کی لمبی قطاریں لگ جانے سے لوگ ٹریفک میں پھنس گئے۔
راولپنڈی اور اسلام آباد میں میٹرو بس سروس بھی معطل کردی گئی ہے جب کہ پولیس کی بھاری نفری کو عوام کی سہولت اور سیکیورٹی کے لیے متبادل راستوں پر تعینات کیا گیا ہے۔
اس کے علاوہ سیکیورٹی ہائی الرٹ کر دی گئی ہے۔ جبکہ ریڈ زون کے علاقوں کے ساتھ ساتھ وفاقی دارالحکومت کے داخلی و خارجی راستوں کو سیل کر دیا گیا۔
ڈی چوک کو بھی کنٹینر لگا کر بند کر دیا گیا ہے۔ ریڈ زون میں داخلے کے لیے صرف مارگلہ ایونیو ایک طرف سے کھلا ہے لیکن جی ٹی روڈ سے ایونیو بند ہے۔
جی ٹی روڈ، روات میں ٹی چوک کے قریب، کیریج فیکٹری کے قریب کنٹینرز رکھے گئے ہیں اور اسلام آباد لنک سے موٹر وے کو بھی بند کر دیا گیا ہے۔
ادھر اسلام آباد کی ضلعی انتظامیہ نے جمعرات کو تمام سرکاری اور نجی تعلیمی ادارے بند رکھنے کا اعلان کر رکھا ہے۔
دوسری جانب ضلعی انتظامیہ نے راولپنڈی میں 24 اگست تک دفعہ 144 نافذ کرتے ہوئے عوامی اجتماعات، مظاہروں اور دھرنوں پر پابندی عائد کر دی ہے۔
