پاکستان کے صوبہ سندھ کے شہر کراچی کی ساحلی پٹی پر سمندری طوفان ’اسنیٰ‘ کا خطرہ ٹل گیا تاہم بادلوں کی موجودگی کی وجہ سے شہر میں بوندا باندی اور ہلکی بارش کا امکان ہے۔
الرٹ میں یہ بھی بتایا گیا ہے کہ پچھلے کچھ دنوں سے سمندر میں درجہ حرارت اور ماحول سازگار تھا، امکان تھا کہ یہ ڈیپ ڈپریشن سمندر میں داخل ہوگا، طوفان بننے کی صورت میں کراچی میں گرج چمک کے ساتھ بارش ہوسکتی تھی۔
کراچی میں حکام کی جانب سے شدید بارش اور طوفانی ہواؤں کے الرٹ کی وجہ سے جمعرات کو شہر کے تمام اسکول آج بند کرنے کا اعلان ہوا تھا۔
تاہم اب محکمہ موسمیات کا کہنا ہے کہ سمندری طوفان اسنی کراچی کے ساحل سےکافی آگے نکل گیا ہے، اس طوفان کے اثرات تقریباً ختم ہو چکے ہیں۔
محکمہ موسمیات نے بتایا کہ آئندہ 24 گھنٹوں میں کراچی کا موسم ابر آلود رہنے کا امکان ہے اور زیادہ سے زیادہ درجہ حرارت 30 سے 32 ڈگری سینٹی گریڈ تک جانے کا امکان ہے۔
