بدھ کے روز پنجاب، خیبر پختونخوا اور وفاقی دارالحکومت اسلام آباد کے مختلف علاقوں میں اچانک ژالہ باری اور گرج چمک کے ساتھ طوفانی بارش ہوئی، جس کے نتیجے میں دونوں صوبوں میں متعدد لوگ جان سے گئے، جبکہ عوامی و نجی املاک اور کھڑی فصلوں کو بھی شدید نقصان پہنچا۔
بارش کے باعث خیبر پختونخوا میں اچانک سیلابی صورتحال پیدا ہوئی، جس سے ٹریفک کا نظام بھی متاثر ہوا۔ اسلام آباد میں ٹینس گیند جتنے بڑے اولے گرنے سے گاڑیوں اور سولر پینلز کو نقصان پہنچا۔
اسلام آباد میں پڑنے والے بہت بڑے اولوں نے کافی تباہی مچائی۔ لوگوں کی گاڑیوں کی شیشے ٹوٹ گئے، گھروں اور مارکیٹوں میں ٹوٹا پھوٹا سامان بکھرا ہوا تھا، اور یہاں تک کہ مشہور فیصل مسجد کی چھت کو بھی نقصان پہنچا۔
راولپنڈی کے علاقے رتہ امرال میں مسجد کی دیوار گرنے سے ایک شخص جاں بحق ہو گیا، جبکہ گوجر خان میں سوہاوہ کے ایک محلے میں گلی سے گزرتی ٹرالی پر دیوار گرنے کے نتیجے میں دو افراد جان کی بازی ہار گئے۔
مظفرگڑھ کے علاقے پل مگسان میں آسمانی بجلی گرنے سے ایک دکاندار جاں بحق ہو گیا۔
خیبر پختونخوا کے ضلع خیبر کی تحصیل لنڈی کوتل میں آسمانی بجلی ایک بنکر پر گری، جس کے نتیجے میں ایک فوجی جوان جاں بحق ہوا۔ مقامی انتظامیہ اور ریسکیو 1122 کے مطابق ہلاک ہونے والے سپاہی کی شناخت الیاس خان کے نام سے ہوئی ہے، جو باڑہ کا رہائشی تھا اور بجلی گرنے سے موقع پر ہی جاں بحق ہو گیا۔
ضلع کے مختلف حصوں میں گندم کی فصلیں بھی تیز ہواؤں کے باعث متاثر ہوئیں۔ کاشتکاروں کو خدشہ ہے کہ بارش اور اولوں سے ہونے والا نقصان گندم کی پیداوار پر منفی اثر ڈالے گا۔
دوسری جانب صوبائی ڈیزاسٹر مینجمنٹ اتھارٹی (پی ڈی ایم اے) کا کہنا ہے کہ وہ خیبر کے اضلاع اور صوبے کے دیگر علاقوں میں ممکنہ سیلابی صورتحال سے نمٹنے کے لیے مکمل طور پر تیار ہے۔ پی ڈی ایم اے نے ضلع خیبر کی انتظامیہ سے بارش اور سیلاب سے ہونے والے نقصانات کی رپورٹ بھی طلب کر لی ہے۔
