بین الاقوامی اتحاد برائے مسلم علماء نے ایک سخت مؤقف اپناتے ہوئے ایک مذہبی فتویٰ جاری کیا ہے جس میں اسرائیل کے خلاف مسلح جہاد (یعنی ہتھیار اٹھا کر لڑنا) تمام مسلمانوں پر شرعی فرض قرار دیا گیا ہے۔

فتویٰ کمیٹی نے اُمت مسلمہ کے تحفظ اور جارحیت کو روکنے کے لیے ایک اسلامی فوجی اتحاد کے قیام کی فوری ضرورت پر زور دیا ہے۔

فوری اقدام کی اپیل

فتویٰ میں واضح کیا گیا ہے کہ فلسطین میں قابض قوت کے خلاف ہر مسلمان پر مسلح جہاد کرنا دینی فریضہ ہے۔ فتوے میں عرب اور اسلامی ممالک سے مطالبہ کیا گیا ہے کہ وہ بغیر کسی تاخیر کے عسکری مداخلت کریں اور اسرائیل پر زمین، سمندر اور فضا کے ذریعے مکمل ناکہ بندی عائد کریں۔ فتویٰ میں مسلم ممالک سے اسرائیل کے لیے پانیوں اور فضائی حدود کی بندش کا بھی مطالبہ کیا گیا ہے۔

اسرائیل کو تیل اور گیس کی فراہمی بند کی جائے

علماء نے فلسطینی مزاحمت کو عسکری، مالی اور قانونی مدد فراہم کرنے کی اہمیت پر زور دیا ہے۔ ان کا کہنا ہے کہ اسرائیل کے ساتھ تعلقات کو معمول پر لانا اسلامی شریعت کے خلاف ہے اور اسرائیل کو تیل یا قدرتی گیس کی فراہمی شرعی طور پر حرام ہے۔ فتویٰ میں ان عرب ممالک کے ساتھ کیے گئے امن معاہدوں پر نظرِ ثانی کا بھی مطالبہ کیا گیا ہے جنہوں نے اسرائیل کے ساتھ تعلقات قائم کیے ہیں۔

اقتصادی دباؤ اور غزہ کے لیے حمایت

عسکری اور سیاسی اقدامات کے ساتھ ساتھ فتویٰ میں دنیا بھر کے مسلمانوں سے مطالبہ کیا گیا ہے کہ وہ غزہ کی حمایت میں ’مالی جہاد‘ کریں۔

ساتھ ہی فتویٰ میں مطالبہ کیا گیا ہے کہ مسلمانوں کو عالمی سطح پر یہ مطالبہ کرنا چاہیے کہ غزہ، جو کہ محصور اور محاصرے میں ہے، وہاں انسانی امداد پہنچانے کے لیے راستے (راہداریاں) کھولے جائیں تاکہ زخمیوں، بے گھر افراد اور عام شہریوں کی مدد کی جا سکے۔

امریکہ میں رہنے والے مسلمانوں سے اپیل

بیان میں امریکہ میں مقیم مسلمانوں سے بھی اپیل کی گئی ہے کہ وہ صدر ڈونلڈ ٹرمپ پر دباؤ ڈالیں تاکہ وہ تشدد کے خاتمے اور امن کے قیام سے متعلق اپنے وعدے پورے کریں۔